महिला उद्यमी सम्मानित

नारी विशेष

गृहपृष्ठ
नारी विशेष
महिला उद्यमी सम्मानित

महिला उद्यमी सम्मानित

सोमबार, साउन २८, २०८१ मुग्लानी खबर

बरहथवा (सर्लाही), २८ साउन : अन्तर्राष्ट्रिय युवा दिवसका अवसरमा सर्लाहीको हरिवन नगरपालिकाले उद्यमी महिलालाई सम्मान गरेको छ ।

आज अन्तर्राष्ट्रिय युवा दिवसको अवसरमा विगत पाँच वर्षदेखि हरिवन नगरपालिका–४, गेल्हामा जुत्ता सिलाउने कारखाना सञ्चालन गरिरहनुभएकी ३२ वर्षीया निर्मला महतोलाई सम्मान गरिएको नगरप्रमुख रमेश बुढाथोकीले जानकारी दिनुभयो । महतोलाई उदाहरणीय कार्य गरेको भन्दै प्रोत्साहन स्वरूप सम्मान गरिएको उहाँले बताउनुभयो । ‘‘यहाँको समाजमा महिला भनेको चुलोचौकामा सीमित हुन्छन् र त्योभन्दा माथि जान सक्दैनन् भन्ने गलत सोच छ । त्यसलाई जवाफ दिन उद्यमी महतो सफल हुनुभएकाले सम्मान गरेका हौँ”, नगरप्रमुख बुढाथोकीले भन्नुभयो,“महतोले चाल्नुभएको कदम अन्य महिलाका लागि पनि प्रेरणाको स्रोत बन्नसक्छ ।”

सम्मानित हुनुभएकी महतोले स्वरोजगार भएर घर खर्च चलाउँछु भनेर सुरू गरेको पेसा उद्योगमा परिणत भएको बताउनुभयो । यसले आफूलाई आर्थिक रूपमा आत्मनिर्भर हुुनुका साथै आत्मसन्तुष्टि र सम्मानसमेत दिएको उहाँले प्रतिकृया दिनुभयो । “हाम्रो समाजमा महिलालाई काम गरिखा सजिलो छैन, त्यसैमा हेयका रूपमा हेरिने जुत्ताको काम झन् कठिन थियो तर मैले आफ्नो कर्ममा निरन्तर लगनशील भएर लागे आज यो अवस्थामा पुगेकी छु । अरूलाई पनि मेहनत गरेमा एक दिन अवश्य सफल भइन्छ भन्ने उदाहरण मिलेको छ”, महतोले भन्नुभयो,“तीनै तहका सरकारले युवालाई इच्छाएको सीपसँगै उद्यमी बन्न प्रोत्साहन सहयोग गर्नसके युवा विदेशिने क्रम पनि रोकिने छ । यसतर्फ ध्यान दिन आग्रह गर्दछु ।”

प्रकाशित मिति: सोमबार, साउन २८, २०८१

प्रतिक्रिया दिनुहोस्