खेमराज सुबेदि : प्रवासी नेपाली मञ्च, राष्ट्रिय कमिटी कतारको आयोजनामा सङ्गठित सदस्यहरूको राष्ट्रिय भेला २५-अगष्ट-२०२३ मा सनैयाको ग्र्याण्ड मल स्थित सेन्चुरी होटलको सभाहलमा सम्पन्न भयो। दिउँसो तीन बजे देखि सन्चालन भएको उक्त कार्यक्रममा २५५ भन्दा बढी सङ्गठनका कर्मठ सङ्गठित सदस्यहरूको उपस्थिती रहेको थियो।
प्रवासी नेपाली मन्च, राष्ट्रिय कमिटी कतारका अध्यक्ष प्रभात त्रिपाठीको अध्यक्षता तथा अन्तराष्ट्रिय कमिटीका उपसचिव चानक पोखरेल को प्रमुख आतिथ्यता रहेको उक्त कार्यक्रममा मध्यपूर्व कमिटी इन्चार्ज कमलमणि गुरागाईं विशेष अतिथि रहेका थिए। केन्द्रिय कमिटीले जारी गरेको निर्देशनको अक्षरस: पालना गर्दै संचालन गरिएको कार्यक्रम खादा, ब्याज तथा माला रहित रहेको थियो भने मन्चलाई वक्ताले बोल्ने क्रममा मात्र उपयोग गरेका थिए।
प्रवासको कर्मभूमिबाट स्वदेशको राष्ट्रियगान गाएर सुरु गरिएको कार्यक्रममा प्रवासी नेपाली मन्च कतार सँग आवद्ध सङ्गठित सदस्यहरूको मन्च सँग सम्बन्धित प्रस्तावहरू संकलन गरेर मन्चलाई अझै सशक्त बनाउन तथा मन्चलाई प्रवासी नेपाली श्रमिकहरूको हीतोपयोगी कार्यहरुमा अझै दृढ पूर्वक लगाउने उदेश्यका साथ सङ्गठित सदस्यहरूको राष्ट्रिय भेलाको आयोजना गरिएको तथ्य मन्चका उपाध्याक्ष बालकृष्ण भित्रिकोटीले कार्यक्रममा आफ्नो स्वागत मन्तव्य राख्ने क्रममा बताएका थिए।
प्रवासी नेपाली मन्च मातहतका विभागहरूले आफ्ना विभागले छैटौँ महाधिवेसन यता गरेका कार्यहरूको प्रतिवेदन कार्यक्रममा वाचन गरेका थिए। जस अन्तर्गत,नगर कमिटी इन्चार्ज टीका कार्कीले नगर कमिटीहरूको प्रतिवेदन प्रस्तुत गरेका थिए । आर्थिक विभागको प्रतिवेदन विभागीय प्रमुख तथा मन्चका उपाध्यक्ष विजय बस्नेतले वाचन गरेका थिए भने श्रमिक समस्या पहिचान तथा समाधान विभागका प्रमुख तथा मन्च उपसचिव खेमराज सुवेदीले अहिले सम्म विभागले प्रवासी नेपाली श्रमिकको हीतमा गरेका कार्यहरू समेटेर विभागको कार्य प्रगति विवरण प्रस्तुत गरेका थिए।
प्रतिवेदनमा विभागले कतार स्थित नेपाली श्रमिकको अतिरिक्त कतार बाहिर कुवेत लगायतका देशमा कार्यरत श्रमिक हरूको हीतमा गरिएको कार्यहरू पनि प्रतिवेदन वाचन गर्ने क्रममा सुनिएको थियो। यसै गरी सङ्गठन विभाग प्रमुख तथा मन्चका सचिव बिनेश तामाङ्गले सङ्गठन विभागको कार्य प्रगति विवरण प्रस्तुत गरेका थिए।
विभागहरूको प्रगति विवरण पश्चात कार्यक्रम आफ्नो मूल उदेश्यमा प्रवेश गरेको थियो। कार्यक्रमको मूल उदेश्य अन्तर्गत संगठित सदस्यहरूको राय, सुझाव सहितका प्रश्नहरू उक्त कार्यक्रममा संकलन गरिएको थियो। प्रवासी नेपाली मन्चको सुद्रिढिकरणको निमित्त राय तथा सुझाव प्रदान गर्ने कार्यमा उलेख्य संगठित सदस्यहरूले सहभागिता जनाएका थिए।
उठेका प्रश्नहरूलाई आफ्ना सम्बोधनका क्रममा सम्बन्धित नेत्रत्वले समेट्दै संगठित सदस्यहरूका जिज्ञासा निरुपण पार्ने प्रयास गरिएका थिए। कार्यक्रम प्रशिक्षणात्मक फर्म्याटमा आयोजना गरिएको हुँदा " गैर आवासीय नेपाली संघ लगायत सामाजिक सङ्घ संस्थाहरू सँग मन्चको सम्बन्ध" कस्तो हुनु पर्ने हो भन्ने सम्बन्धमा सागर नेपालले प्रशिक्षणात्मक अभिव्यक्तिका क्रममा आफ्ना धारणाहरू व्यक्त गरेका थिए।
यसै गरी "संगठन निर्माण, शुद्धिकरण र सुद्रिढिकरण" विषयमा प्रशिक्षण दिँदै मन्चका मध्य पूर्व इन्चार्ज कमलमणि गुरागाईंले " सङ्गठित सदस्यहरू संगठनको जग तथा मूल खम्बा भएको हुँदा संगठन निर्माण गर्दा वा निर्माण पश्चात सुद्रिढिकरण गर्दा शुद्धिकरण को पक्षलाई आवश्य ध्यानमा राख्नु पर्दछ" भने। शुद्दिकरणको अभियान भर्खरै मिसन ग्रासरुट अन्तर्गतको अभियानमा सम्पन्न गरेको समेत आफ्नो प्रशिक्षणात्मक अभिव्यक्तिका अन्त्यमा बताए।
प्रशिक्षणको निम्ति प्रदान गरिएको विषय "संगठन निर्माणमा संचार माध्यमको पहुँच र प्रभाव" उपर बोल्दै कार्यक्रमका प्रमुख अतिथि चानक पोखरेलले " शरीरको निम्ति रक्त संचार जति महत्वपूर्ण हुन्छ, संगठन को निम्ति संचार माध्यम त्यति नै महत्वपूर्ण हुन्छ" भने। आफ्नो अभिव्यक्तिको क्रममा उनले जहाँ नेपाली त्यहाँ प्रवासी नेपाली मन्च भन्ने मूल नाराका साथ अहिले विश्वका ४१ स्थान भन्दा धेरै ठाउँमा प्रवासी नेपाली मन्चले प्रवासिएका नेपालीहरूको हीतमा काम गरिरहेको बताए।
"मन्चले प्रवासमा काम गरिरहेको छ तर प्रचार प्रसार सशक्त हुन नसक्दा यसको ब्रान्डीङ्ग उचित रूपमा हुन नसकेर क्षति व्यहोरी रहेको आभास भएको छ" भने। भेलामा उठेका प्रश्न तथा सुझावलाई लिएर कतार स्थित प्रवासी नेपाली मन्चले आफ्नो सङ्गठनलाई सुद्रिढिकरण गरी विश्वभरि रहेका मन्चहरू मध्यको अव्वल प्रवासी नेपाली मन्च बनाउन आफूले सक्दो सहायोग गर्ने बताए यसका साथै GSG कतार सँगको समन्वयमा भएका तीता मीठा कुराहरूलाई मिलाएर संगठन एक ढिक्का हुँदै नङ्ग र मासु झैँ एक ढिक्का बनेर आगामी दिनमा बढ्नु पर्ने कुरा आफ्नो प्रशिक्षणात्मक अभिव्यक्तिको अन्त्यमा बताए।
आयोजित प्रवासी नेपाली मन्च कतारको सङ्गठित सदस्यहरूको राष्ट्रिय भेला २०२३ ले संगठित सदस्यहरूको तर्फबाट प्रदान गरिएको राय तथा सल्लाहलाई समेट्दै संगठनको सुद्रिढिकरणको निमित्त सात बुँदा सहितको प्रस्तावित प्रतिवद्धताहरू संगठित सदस्यहरू समक्ष प्रस्तुत गरेर ती प्रस्तावहरू उपर निर्णय गर्दै पास गरेको थियो। जस अन्तर्गत आगामी दिनहरूमा कतारमा रहेका नेपाली श्रमिकहरूलाई समेट्दै सामाजिक सुरक्षा कोष तथा जनचेतना मूलक कार्यक्रम गर्ने कार्यलाई तीव्रता दिने निर्णय समेत भेलाले गरेको थियो।
कार्यक्रमको अन्त्यमा प्रवासी नेपाली मन्च राष्ट्रिय कमिटी कतार तथा कार्यक्रमका अध्यक्ष प्रभात त्रिपाठीले "संगठन शुद्धिकरण र सुद्रिढिकरणलाई मध्यनजर गर्दै संगठित सदस्यको राष्ट्रिय भेलाको आयोजना गरिएको हो" भने। "संगठित सदस्यले संगठन निर्माण र परिचालन के हो भन्ने बिषयलाई मजबुतीका साथ ग्रहण गर्नका लागि पनि भेलाको आयोजना गरिएको हो" भने ।
उठेका प्रश्नहरुको जवाफमा उत्तर दिंदै संगठनमा ब्यक्तिको प्रकृति अनुरुप कसैलाई उच-निच देखाउन नहुने, त्यस्तो प्रबृति समाज र संगठनका लागि हितकर नहुने जनाउँदै संगठनको सदस्यले बिचार विधि तथा पद्दतिलाई अंगिकार गरेर हिंड्नुपर्ने बताएका थिए। मञ्चमा, इतिहासमा जस्तो कुनै वैचारिक दुई लाइन संघर्ष नभएको, कुनै स्वार्थ सँग सम्बधित समुह नभएको, विशेष गरि कतारको सम्बन्धमा राष्ट्रिय कमिटी एकढिक्का रहेकोले त्यस्ता असहमतिका स्वार्थलिप्त गुन्जायस संगठनमा नआएका र आउन पनि नदिइने भनाई आफ्नो मन्तव्यको अन्त्यमा राख्दै उपस्थित सबै तह र तप्काका जिम्मेवार सबैलाई आभार प्रकट गरी सङ्गठित सदस्यहरूको राष्ट्रिय भेला कार्यक्रम सफलता पूर्वक समापन भएको घोषणा गरेका थिए ।
उक्त कार्यक्रमको सहजिकरण तथा संचालन मन्चका सचिव तथा संगठन विभाग प्रमुख बिनेश तामाङ्गले गरेका थिए।
