नेपाल संवत्को नयाँ वर्ष ११४३ का लागि सात वटा भित्तेपात्रोले नेपाल पञ्चाङ्ग निर्णायक विकास समितिसँग प्रकाशनको स्वीकृति लिएका छन् ।
चान्द्रमासअनुसार प्रत्येक वर्ष कार्तिक शुक्ल प्रतिपदादेखि नेपाल संवत्को नयाँ वर्ष सुरु हुन्छ । यस वर्ष कात्तिक ९ गते बुधबारदेखि नेपाल संवत्को नयाँ वर्ष ११४३ सुरु हुँदैछ । मन्त्रिपरिषद्ले २०७७ पुस २० गते पञ्चाङ्ग निर्णायक समितिको गठन आदेश स्वीकृत गरेको थियो । गठन आदेशअनुसार नेपालबाट प्रकाशन हुने पात्रो (पञ्चाङ्ग) र भित्तेपात्रो (क्यालेण्डर)ले प्रकाशन गर्नुअघि समितिको स्वीकृति लिनुपर्ने व्यवस्था छ । समितिको स्वीकृति नलिई प्रकाशन हुने भित्तेपात्रो अध्ययन गरी कारबाही गर्न अनुगमन उपसमिति पनि गठन गरिएको छ ।
नेपालका सबै जातजातिको नयाँ वर्षमा निस्कने पात्रो एवं भित्तेपात्रोले समितिसँग स्वीकृति नलिए कारबाहीका लागि सिफारिस गर्ने गरी तयारी गरिएको उपसमितिका सदस्यसमेत रहनुभएका समितिका कर्मचारी खिलहरि घिमिरेले राससलाई जानकारी दिनुभयो । नेपाल भाषाको भित्तेपात्रोका लागि नेवा ः देय् दबु चन्द्रागिरि नगरपालिका–१२, बलम्बु, ललितपुर महानगरपालिका–२८ र २९ कार्यालय, हरिसिद्धि, हलिं नेवा ः गुठी, मूज्याकु थक्वा ः, इमाद्वों नेवा ः दबु, महालक्ष्मी नगरपालिका–१, नेपाली कांग्रेस भक्तपुर नगर समिति, ज्यापू समाज यल, ललितपुर, श्रीकृष्ण सिर्जनशील नेवा ः खलः, खैरेनीटार, तनहुँले स्वीकृति लिएको उहाँले बताउनुभयो ।
भित्तेपात्रो प्रकाशन गर्न सातै संस्थाले रु पाँच हजारको रसिद काटेर स्वीकृति लिएका हुन् । स्वीकृति नलिई प्रकाशन हुने पात्रो र भित्तेपात्रोलाई कारबाही गर्न समितिले मस्यौदाका रुपमा बनाएका कार्यविधि हाल स्वीकृतिका लागि संस्कृति, पर्यटन तथा नागरिक उड्ययन मन्त्रालयमा पेश गरिएको समितिका सदस्य सचिवसमेत रहनुभएका कार्यकारी निर्देशक सूर्यप्रसाद ढुङ्गेलले राससलाई जानकारी दिनुभयो ।
मन्त्रालयको सुझाव प्राप्त भएपछि कार्यविधिलाई अन्तिम रुप दिई कार्यान्वयनमा ल्याइने जनाइएको छ । कार्यविधि स्वीकृति भएपछि स्वीकृति नलिने सबै पात्रो र भित्तोपात्रोका प्रकाशक कारबाहीमा पर्ने भएका छन् । पात्रो र भित्तेपात्रोमा फरक फरक तिथि, मिति, साइतलगायत विषयवस्तु उल्लेख गरिएको भन्दै सरकारले यस्तो व्यवस्था गरेको हो । तिथि, मिति फरक पर्दा चाडपर्वका नाउमा एकरुपता नभई समस्या आउने गरेको थियो ।
