टङ्कीसिनवारी, २५ असोज । मोरङको बूढीगङ्गा गाउँपालिकामा पहिलो पटक सञ्चालनमा ल्याइएको सूचना प्रविधि (आइटी) विषयको रोजगारमूलक औद्योगिक प्रशिक्षण तालिमका लागि पुरूषभन्दा महिला बढी उत्सुक देखिएका छन् ।
बूढीगङ्गा गाउँपालिका–३ को बाँसबारीमा रहेको श्री जनप्रिय माध्यमिक विद्यालयको प्राविधिक तथा व्यावसायिक शिक्षा तालिम केन्द्रले तालिमका लागि छनोट कार्य सम्पन्न गरेको छ । असोज अन्तिमदेखि सुरू हुने तालिमको अवधि २४ महिना छ । चालिस सिटका लागि सञ्चालन गरिएको प्रवेश परीक्षामा ७० प्रतिशत महिला छनोट भएका छन् । छनोट भएका अधिकांश पिछडा, दलित र विपन्न महिला छन् ।
छनोट हुनुभएकी दुहबी–११ की सुजिता मण्डलले महिला शिक्षित हुँदै गएको र स्वतन्त्रतापूर्वक श्रम गरेर बाँच्न सक्षम भएको बताउनुभयो । उहाँले सीप सिकेर दक्ष बनी उद्योगमा जागिर खाँदा पारिश्रमिक बढी पाइने र काम गर्न पनि सजिलो हुने बताउनुभयो ।
बूढीगङ्गा–३ बस्ने अञ्जली खवासले तालिम लिएर काममा दक्ष हुनेलाई उद्योगमा जागिर खान सजिलो हुने भएकाले आफू पनि तालिममा सहभागी बन्ने बताउनुभयो ।
प्राविधिक शिक्षा तथा व्यावसायिक तालिम परिषद् (सिटिइभिटी) को सम्बन्धन प्राप्त तालिम पूर्ण निःशुल्क छ । समाजमा रहेका गरिब, विपन्न, पिछडा समुदायको आर्थिक स्तरोन्नतिका लागि सञ्चालन गर्न लागिएको तालिममा प्रशिक्षार्थीका लागि खान र बस्नसमेतको व्यवस्था गरिएको छ ।
नौ महिना सैद्धान्तिक कक्षा हुनेछ भने बाँकीको १५ महिना तोकिएको उद्योगमा गएर प्रयोगात्मक तालिम लिनु पर्नेछ । प्रयोगात्मक तालिममा प्रशिक्षार्थीले सम्बन्धित उद्योगबाट प्रोत्साहन भत्तासमेत पाउने व्यवस्था मिलाइएको छ ।
तालिमका संयोजक लवकुमार यादवले नेपाली दक्ष भए विदेशबाट उद्योगका लागि कामदार मगाउनु नपर्ने बताउनुभयो । उहाँले तालिमका लागि पुरूषभन्दा महिलामा बढी आकर्षण देखिएको बताउनुभयो । यादवले सीप सिकेर आत्मनिर्भर बन्नेतर्फ महिलाउन्मुख बन्दै गएको जानकारी दिनुभयो । रासस
