चितवन : नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहाल प्रचण्डले विपद्को समयमा जनताको जीउ धन भन्दा ठूलो अरु नहुने बताउनुभएको छ । जिल्ला प्रशासन कार्यालय चितवनले आज यहाँ आयोजना गरेको अन्तरक्रिया कार्यक्रममा बोल्दै उहाँले विपद्मा राजनीति भन्दा ठूलो जनता हुने बताउनुभएको हो ।
बाढिपहिरोमा परेका जनताको उद्धार र उनीहरुको व्यवस्थापनसँगै क्षति न्यूनिकरण पहिलो प्रथामिकतामा राखेर काम गर्नु पर्ने उहाँको भनाइ थियो । उहाँले भन्नुभयो, “विपद्मा राजनीतिलाई दोस्रो प्रथामिकतामा राखेर काम गर्नु पर्छ ।” अहिले राजनैतिक समस्या भए पनि त्यो समाधानका लागि विभिन्न तरीकाले लागि परेको बताउँदै उहाँले यो सबै दोस्रो प्रथामिकता भएको बताउनुुभयो ।
नारायणी नदीले पारेको प्रभावको विषयमा बुझ्न यहाँ आउनु भएका दाहालले नारायणी नदीको जोखिम अझै कायम रहेको र यसलाई समयमानै व्यवस्थापन गर्न नसकिए ठूलो क्षति हुने बताउनुभयो । नियन्त्रणको काम भइरहेको समयमा बाढी आएर काम अधुरै छोड्दा जनतामा त्रास वढेको उहाँको भनाई थियो । अहिलेको व्यवस्थापन कम्जोर भएको भन्दै उहाँले नारायणी नदीको फाईदा र जोखिमको आँकलन गर्दै काम अघि वढाउनु पर्ने जानकारी दिनुभयो ।
नदी व्यवस्थापनका लागि निकुञ्ज ऐन तथा नीति संशोधन आवश्यक रहेको उहाँले बताउनुभयो । उहाँले भन्नुभयो, “निकुञ्जको नीतिसँग सम्बन्धित नीतिहरु हिजोको आवश्यकतालाई मध्यनजर गरेर वनाईएका हुन । ती नीति, ऐनहरु वदलिएको परिस्थितिलाई हेरेर परिवर्तन आवश्यक छ ।”
फरक प्रसंगमा बोल्दै पूर्वप्रधानमन्त्री समेत रहनु भएका दाहालले वर्तमान सरकारले चितवनलाई वेवास्ता गरेको गुनासो गर्नु भयो । उहाँले भन्नुभयो, “चितवनको विकास भयो भने प्रचण्डले जस पाउँछ भन्ने सरकारलाई लागेको छ ।”
कार्यक्रममा चितवनका प्रमुख जिल्ला अधिकारी प्रेमलाल लामिछानेले जिल्लामा विपद्को अवस्थाको बारेमा जानकारी गराउनु भएको थियो । कोरोना कहर देखि बाढी पहिरोको अवस्थाका बारेमा जानकारी गराउँदै उहाँले २९ हजार परिवार प्रभावित हुने अनुमान गरिएको बताउनुभयो । उहाँले भन्नुभयो, “वाढीका कारण जिल्लामा ४६ हजार जनता र २९ हजार परिवार प्रभावित हुने देखिएको छ ।” खोज तथा उद्धारका लागि आवश्यक सामग्री अपुग रहेको उहाँको भनाई थियो ।
सो अवसरमा स्वास्थ्य कार्यालय चितवनका प्रमुख दिपक तिवारीले कोरोना कहरका कारण आएको समस्याका बारेमा जानकारी दिनुभयो । नारायणी नदी व्यवस्थापन आयोजनाका प्रमुख रुकमाङ्गत खनालले नदी नियन्त्रणका लागि वनेको गुरु योजना अनुसार वजेट नआउँदा काम प्रभावकारी रुपमा गर्न नसकीएको बताउनुभयो ।
