प्रा.डा. गणेश गुरुङ
वरिष्ठ हाडजोर्नीरोग विशेषज्ञ
हाडजोर्नीको विकास र मजबुतीका लागि मान्छेलाई उमेरअनुसार क्याल्सियम जरुरत पर्छ । बढ्दो उमेरका बच्चालाई त क्याल्सियम झनै आवश्यक पर्छ । यो उमेरमा क्याल्सियम अभाव भयो भने विभिन्न समस्या निम्तिन सक्छ । हाडजोर्नी विशेषज्ञ प्रा.डा. गणेश गुरुङले हलक्क बढ्दै गरेका बच्चामा क्याल्सियम कम हुँदा निम्तिने समस्याबारे सजग गराएका छन् :
शरीरमा क्याल्सियम कम हुँदा समस्या
शारीरिक विकासको क्रममा बच्चाको हातगोडा दुख्ने समस्या आउन सक्छ । यस्तो समस्यालाई मेडिकलमा ‘ग्रोइङ पेन’ (बढ्दो उमेरको समस्या) भनिन्छ । बच्चामा यो समस्या देखिनुको कारण हो, शरीरमा क्याल्सियमको कमी । बच्चा बढ्दै जाँदा उनीहरूलाई आवश्यक क्याल्सियमको कमीले जोर्नी तथा हड्डी दुख्ने समस्या निम्तिन्छ । बढी चुलबुले बच्चामा समस्या बढी हुन्छ किनभने धेरै खेल्ने बच्चालाई क्याल्सियमको मात्रा बढी चाहिन्छ ।
उमेरअनुसार शारीरिक विकास हुन त्यसैअनुसारको क्याल्सियम शरीरले पाउनुपर्छ । यो अवस्थामा गडबडी हुँदा बच्चाको हाडजोर्नी दुख्छ । खानपानमा विशेष ध्यान दिएर बच्चालाई क्याल्सियम पूर्ति गराउनुपर्छ । हरेक दिन बच्चालाई सामान्य मालिस गर्दा पनि दुखाइमा धेरै राहत मिल्छ ।
उमेरअनुसार बच्चालाई क्याल्सियम
उमेरअनुसार बच्चालाई क्याल्सियम जरुरत पर्छ । ६ महिनामुनिको बच्चालाई प्रतिदिन २ सय मिलिग्राम, ६ महिनादेखि एक वर्षसम्मको बच्चालाई २ सय ६० मिलिग्राम, एकदेखि तीन वर्षसम्मको बच्चालाई प्रतिदिन ७ सय मिलिग्राम क्याल्सियम चाहिन्छ । चारदेखि आठ वर्षसम्मको बच्चालाई प्रतिदिन १ हजार मिलिग्राम र नौदेखि १३ वर्षसम्मको बच्चालाई प्रतिदिन १३ सय मिलिग्राम क्याल्सियम आवश्यक पर्छ । बच्चालाई विभिन्न खानेकुराबाट क्याल्सियमको मात्रा पूर्ति गर्न सकिन्छ ।
क्याल्सियमका मुख्य स्रोत
दूध, दही, चिजमा क्याल्सियमको मात्रा सबैभन्दा राम्रो पाइन्छ । सुन्तलाको जुस, चकलेट मिल्क, चाइनिज बन्दागोवी, चिप्ले भिन्डी, ब्रोकाउली, बदाम, माछालगायतमा पनि क्याल्सियमको मात्रा धेरै हुन्छ । बच्चाको उमेरअनुसार यस्ता खानामा जोड दिनुपर्छ ।
यो पनि
कतिपय बच्चाको जोर्नी दुख्नुको कारण बाथ पनि हुनसक्छ । यस्तो समस्या कतिपयको आफँै ठीक भएर जान्छ भने कतिपयले पछिसम्म औषधि सेवन गर्नुपर्ने हुन्छ । चिकित्सकलाई देखाएर यसबारे वेलैमा निश्चिन्त हुनु उत्तम हुन्छ । बच्चाको दुखाइ ढाडको छ भनेचाहिँ विशेष ध्यान दिनुपर्छ । बच्चामा ढाड दुख्ने मुख्य कारण ‘प्याथोलोजिकल’ समस्याले गर्दा हुन्छ । कसैको ढाडको हड्डी स्लिप भइदिएर तथा कसैको जन्मिँदै हड्डीमा समस्या भएर ढाड दुख्ने गरेको हुन सक्छ । जन्मिँदै देखिएको समस्या ट्युमर पनि हुन सक्ने भएकाले विशेषज्ञको सल्लाह लिन ढिला गर्नु हुँदैन । तर, बढ्दै गरेको बच्चामा हड्डी तथा जोर्नीमा समस्या देखिने मुख्य कारण भने क्याल्सियमको कमी नै हो ।
नयाँपत्रीकाबाट http://www.enayapatrika.com/2016/09/90932#sthash.0rvDFA8V.dpuf
