प्रतिनिधिसभा सदस्य एवं सत्तारुढ नेपाल कम्युनिष्ट पार्टी(नेकपा) का केन्द्रीय सदस्य खगराज अधिकारीले राजनीतिक अस्थिरता निम्त्याएर देशलाई अराजकतातर्फ धकेल्न खोजिएको बताउनुभएको छ ।
लेखनाथ सामुदायिक सेवा केन्द्रको सातौँ अधिवेशनबाट निर्वाचित कार्य समितिको आज गरिएको पदभार ग्रहण कार्यक्रममा उहाँले राष्ट्रिय अखण्डताको पक्षमा दृढका साथ उभिएको वर्तमान सरकारलाई अहिले चौतर्फी राजनीतिक घेराबन्दी गरिएको बताउनुभयो ।
गण्डकी प्रदेश अर्थ तथा विकास समितिका सभापति दीपक कोइरालाले विकास र सामाजिक सङ्घ संस्थामा राजनीतिले प्रभाव पार्न नहुने बताउनुभयो । रुपा गाउँपालिकाका अध्यक्ष नवराज ओझाले सामाजिक विकृतिविरुद्ध सञ्चालन गरिने अभियानमा गाउँपालिकाले सहयोग गर्ने प्रतिबद्धता व्यक्त गर्नुभयो ।
सेवा केन्द्रको सातौ अधिवेशनबाट अध्यक्षमा त्रिलोचन लामिछाने, उपाध्यक्षमा लक्ष्मीप्रसाद ढुङ्गाना, सचिवमा कृष्णप्रसाद अधिकारी, कोषाध्यक्षमा गङ्गाकुमारी खनाल र सहसचिवमा हरि बस्ताकोटी निर्वाचित हुनुभएको थियो ।
यसैगरी सदस्यहरुमा गणेश ढुङ्गाना, दीपक भण्डारी, बुद्धिमाया थापा मगर, बुद्धिसागर पौडेल, सुरजजङ्ग राणा, शिवबहादुर रानाभाट, विनोद थापा र राजु अधिकारी निर्विरोध निर्वाचित हुनुभएको थियो । केन्द्रले साविक लेखनाथ र रुपा गाउँपालिकालाई कार्यक्षेत्र बनाइ विभिन्न सामाजिक क्रियाकलाप गर्दै आइरहेको छ ।
