कोरोना भाइरसको सङ्क्रमण फैलने डरसँगै असारे झरीका बीच वाग्मती सफाइ अभियानकर्मी भने बिहानै नदी किनारमा देखिए ।
वाग्मती सफाइ महाअभियानको ३७२औँ हप्तामा पशुपति र शङ्खमूल क्षेत्रमा सफाइ गरिएको छ । पशुपति क्षेत्रस्थित आर्यघाटको नदी किनारमा अभियानकर्मी एवं अधिकारसम्पन्न वाग्मती सभ्यता एकीकृत विकास समिति सञ्चालक सदस्य माला खरेलको नेतृत्वमा सात जनाको समूहले सफाइ गरेको छ ।
पशुपति क्षेत्रको आर्यघाटको नदी किनारमा विगत हप्तामा भन्दा कमै फोहर भेटिएको जनाइएको छ । पशुपति क्षेत्रका सबै स्थानमा सफाइलाई महत्व दिनुपर्ने देखिएको पनि उहाँले बताउनुभयो
शङ्खमूलको वाग्मती र मनोहरा नदीको दोभान क्षेत्रमा अभियानकर्मी डा लक्ष्मी पौडेलको नेतृत्वमा सफाइ गरियो । सफाइमा जीवन योग प्रयोगशाला संयुक्त राष्ट्र सङ्घीय उद्यान (युएन पार्क) का रामप्रसाद पन्थी, हनुमान मार्ग टोल विकास समितिका पदाधिकारीलगायत स्थानीयवासीले त्यस क्षेत्रमा जम्मा भएको झारपातलगायत फोहर उठाई कुहिने र नकुहिने फोहरसमेत छुट्याएर व्यवस्थापन गरिएको थियो
विष्णुमती सफाइ अभियानको ३००औँ हप्तामा टोखा नगरपालिका–९ आनन्दटोलको सडक, सडक पेटी र नाली क्षेत्रमा सफाइ गरिएको छ । सफाइमा नेपाल प्रहरीसहित अभियानकर्मी गरी २० जनाको सहभागिता रहेको संयोजक शोभाकान्त पाण्डेले राससलाई जानकारी दिनुभयो
बन्दाबन्दी शुरु भएपछि चक्रपथको उत्तरी क्षेत्रमा आज पहिलोपटक सफाइ गरिएको छ । यातायात र मानिसको चाप नभएकाले सडक किनारमा फोहर कम देखिएको, भएको केही फोहर पनि लामो हुँदै गएको घाँस छोपिन लागेकाले त्यसलाई हटाइएको अभियानकर्मी लोकबहादुर टन्डनले जानकारी दिनुभयो
ललितपुरको गोदावरी खोला सफाइ अभियानको ६९औँ हप्तामा अभियानकर्मीले नदी किनारमा आफूलाई अनुकूल हुने स्थानमा सफाइ गरेका छन् । सबै अभियानकर्मी एकै ठाउँमा जम्मा हुँदा कोरोनाको सङ्क्रमण फैलन सक्ने भएकाले विकेन्द्रित रुपमा सफाइ अभियानलाई निरन्तरता दिइएको संयोजक बेबी राजभण्डारीले बताउनुभयो
विसं २०७० जेठ ५ गते शुरु भएको वाग्मती सफाइ महाअभियान झरी, जाडो, चाड पर्वमा पनि निरन्तर जारी छ । चैत ११ गते बन्दाबन्दी शुरु भएपछि भने १५ गते नदी किनारमा सफाइ गर्न नसके पनि टोलटोलमा अभियानकर्मीले सफाइ गरेका थिए । त्यसपछिका शनिबार भने नदी किनारमा निवास भएका अभियानकर्मीले सफाइ महाअभियानलाई निरन्तरता दिँदै आएका छन्
बन्दाबन्दी हुनुअघिसम्म वाग्मती सफाइ महाअभियानबाट प्रभावित भई देशभर १०६ स्थानमा सफा हुन थालेको छ । नदी किनारमा जान नसक्ने अभियानकर्मीले भने अहिले पनि टोल सफाइ अभियानलाई निरन्तरता दिइरहेका छन् । आजदेखि चक्रपथको उत्तरी खण्ड र विष्णुमती सफाइ अभियानले पनि पुनः निरन्तरता पाएको जनाइएको छ I