बाँकेको नरैनापुरमा आज भेटिएका कोरोना सङ्क्रमित आठै जना तीन दिनअघि अवैध नाकाबाट नेपाल भित्रिएको पाइएको छ । जिल्लाको राप्तीपारि दक्षिणपूर्व भारतसँग सीमा जोडिएको नरैनापुरको सीमामा भारतका विभिन्न शहरमा मजदूरी गर्न गएका स्थानीयवासी अलपत्र परेपछि गाउँपालिकाले उद्धार गरेर क्वारेन्टाइनमा राखेको थियो ।
गत बुधबार जिल्ला स्वास्थ्य कार्यालय नेपालगञ्जबाट खटिएको स्वास्थ्य टोलीले त्यहाँ शङ्कास्पद ४५ जनाको स्वाब नमूना सङ्कलन गरी भेरी अस्पताल नेपालगञ्जमा गरिएको परीक्षणमा नरैनापुर १, ३ र ५ निवासी १८, २०, २२, २५, २५, २७, ३२ र ३६ वर्षीय आठ पुरुषमा कोरोना देखिएको स्वास्थ्य कार्यालय बाँकेका कोरोना फोकल पर्सन नरेश श्रेष्ठले जानकारी दिनुभयो । उहाँका अनुसार सङ्क्रमित सबै भारतबाट आएका हुन् । उनीहरुको यसअघि नेपालगञ्जमा भेटिएका सङ्क्रमितसँग सम्पर्क नरहेको पाइएको छ । सङ्क्रमितलाई उपचारका लागि नेपालगञ्ज ल्याउने तयारी भएको छ ।
हाल नरैनापुरमा ४४१ जना क्वारेन्टाइनमा छन् । सबै भारतबाट आएका हुन् । पछिल्लो समयमा भारतका विभिन्न ठाउँमा बाँके प्रवेश गर्नेमा नरैनापुरका बढी छन् । नरैनापुरमा एकै पटक आठ जनामा कोरोना पुष्टि भएकाले अझै सजगता आवश्यक देखिएको श्रेष्ठले बताउनुभयो । नरैनापुर गाउँपालिकामा पछिल्लो तीन दिनमा मात्रै ४०७ जना भारतबाट भित्रिएको गाउँपालिका अध्यक्ष इस्तियाक अहमद शाहले बताउनुभयो । उहाँका अनुसार भारतका विभिन्न शहरमा मजदूरी गर्न गएका स्थानीयवासीलाई गाउँपालिकाले सीमाबाट उद्धार गरेर १० क्वारेन्टाइनमा राखेको छ । क्वारेन्टाइनमा आएर बसेकाहरुको पिसिआर परीक्षणका लागि स्वाब सङ्कलन भइरहेको छ ।
परीक्षणमा जनशक्ति थप व्यवस्थापन
कोरोना परीक्षण दायरा बढाउन कोरोना परीक्षण प्रयोगशालामा जनशक्ति थप व्यवस्थापन गरिएको छ । जिल्ला स्वास्थ्य कार्यालयले स्थानीय तह तथा विभिन्न अस्पतालका २० स्वास्थ्यकर्मीलाई स्वाबको नमूना सङ्कलन गर्ने तालीम दिएर जनशक्ति थप गरिएको स्वास्थ्य कार्यालयका कोरोना फोकल पर्सन श्रेष्ठले जानकारी दिनुभयो ।
उहाँका अनुसार स्थानीय तहमा कार्यरत ल्याब टेक्निसियन र ल्याब असिस्टेन्टलाई तालीम दिइएसँगै अब बाँकेमा स्वाब सङ्कलन गर्ने जनशक्ति बढेको छ । जनशक्ति बढेसँगै अब शङ्कास्पद घटनाका आधारमा नमूना सङ्कलनको दायरा बढाइने छ । भेरी अस्पतालका मेडिकल सुपरिटेण्डेण्ट डा प्रकाश थापाले स्वाब सङ्कलन गर्ने जनशक्ति थपिएसँगै अब समुदायस्तरमा परीक्षणले थप गति लिने बताउनुभयो । कोरोना परीक्षणको नतिजामा कुनै शङ्का नगरी सहभागी हुनसमेत उहाँले शङ्कास्पद सबै नागरिकमा आग्रह गर्नुभयो ।
भेरी अस्पतालमा बिहीबार दिउँसोसम्म एक हजार ११८ जनाको कोरोना परीक्षणका लागि स्वाब सङ्कलन भएकामा एक हजार १०८ को परीक्षण सम्पन्न भएको छ । एक हजार ८४ जनाको परीक्षण रिपोर्ट नेगेटिभ आउँदा २५ जनाको रिपोर्ट पोजेटिभ आएको छ ।
सशस्त्र अस्पतालमा कोरोना परीक्षण
कोहलपुरमा रहेको सशस्त्र प्रहरी अस्पतालमा कार्यरत कर्मचारी तथा चिकित्सकसहित ३० जनाको स्वाब नमूना सङ्कलन गरिएको छ । अस्पतालमा रहेका एक कर्मचारीलाई कोरोना सङ्क्रमणको लक्षण देखिएपछि अन्य कर्मचारीको स्वाब सङ्कलन गरीएको हो । अस्पतालमा कार्यरत एक प्रहरी जवानलाई कोरोना सङ्क्रमणको आशङ्का गरिएको फोकल पर्सन नरेश श्रेष्ठले जानकारी दिनुभयो ।
उहाँका अनुसार ती प्रहरी जवान हाल काठमाडौँमा रहे पनि केही दिन पहिलेसम्म कोहलपुरस्थित सशस्त्र अस्पतालमा कार्यरत थिए । काठमाडौँ दरबन्दी भए पनि लकडाउनका कारण कोहलपुरमै रोकिएकाले उनी सशस्त्र प्रहरीको अस्पतालमा हाजिर लगाउँदै आएका थिए ।
केही दिनअघि काठमाडौंँबाट औषधि लिएर आएको सशस्त्रको गाडीमा कञ्चनपुरबाट फर्किएका एक महिलासँगै र कोहलपुरबाट गएका प्रहरी जवानलाई कोरोना सङ्क्रमणको लक्षण देखिएपछि कोहलपुरबाट बिहीबार ३० जनाको स्वाब नमूना सङ्कलन गरिएको श्रेष्ठले जानकारी दिनुभयो ।
