सिन्धुपाल्चोकमा बाहिरी जिल्लाबाट तरकारी र फलफूल ल्याउन रोक लगाइएको छ । कोभिड–१९ विपद् व्यवस्थापन केन्द्रको बैठकले कोरोना सङ्क्रमणको जोखिम हुने भन्दै बाहिरी जिल्लाबाट आउने तरकारी र फलफूल ल्याउन रोक लगाएको हो । आयातमा रोक लगाएसँगै जिल्ला भित्रने नाकामा सुरक्षा व्यवस्था कडा बनाइएको प्रमुख जिल्ला अधिकारी उमेशकुमार ढकालले जानकारी दिनुभयो । स्थानीयरूपमै उत्पादन गरिएका तरकारी तथा फलफूललाई बजारमा ल्याउने र समन्वयका लागि स्थानीय तहलाई जिम्मा दिने निर्णय गरिएको ढकालले बताउनुभयो । “हामीले अन्य जिल्लाबाट आउने तरकारी फलफूलको आयात मात्रै रोकेका हौँ, जिल्लामा उत्पादन भएका बिक्रीवितरण गर्न पाइन्छ”, उहाँले भन्नुभयो, “जिल्लामै उत्पादन भएका तरकारी फलफूलले पुग्छ ।”
बाहिरबाट आउने तरकारी आयातमा रोक्दा जिल्लामा अभाव नहुने प्रधानमन्त्री कृषि आधुनिकीकरण परियोजना कार्यान्वयन एकाइ, सिन्धुपाल्चोकका वरिष्ठ कृषि अधिकृत प्रकाश पौडेलले बताउनुभयो । “सामान्यतया सागपात र तरकारी प्रायः सबैले आफ्नो करेसाबारीमा रोपेकै छन् । यस वर्ष मात्रै जिल्लामा ७६ हजार टन आलु फलेको छ, जिल्लालाई जम्मा ३५ हजार टन आलु चाहिन्छ ।”
वितरण प्रणाली कमजोर भएका कारणले कुन पालिकामा आवश्यकताभन्दा बढी सञ्चय भएको छ र कुन पालिकामा अपुग भएको छ, त्यसको लेखाजोखा गरी समन्वय गर्दा समस्या नआउने उहाँले बताउनुभयो ।
आवतजावतमा थप कडाइ
मेलम्ची नगरपालिकाले आवतजावतमा थप कडाइ गरेको छ । आजै मात्र लुम्बिनीबाट आएका एक जनालाई क्वारेन्टाइनमा राखिएको छ । उनलाई लिएर पाँचपोखरी थाङ्पाल गाउँपालिका जान लागेका मोटरसाइकलचालक र उनलाई खाल्डेखोला प्रहरीले नियन्त्रणमा लिएको इलाका प्रहरी कार्र्यालय मेलम्चीका प्रहरी निरीक्षक फलबहादुर तामाङले जानकारी दिनुभयो । चालकलाई भने होमक्वारेन्टाइनमा बस्न भनिएको छ । मोटरसाइकलको माध्यमले मानिस ओसारपसार गर्नेलाइ निगरानी गरी यस्तो गतिविधिलाई बन्द गरिने मेलम्ची नगर उपप्रमुख भगवती नेपालले जानकारी दिनुभयो । अहिले मेलम्ची क्षेत्रीय क्वारेन्टाइनमा आठ जना रहेको उपप्रमुख नेपालले जानकारी दिनुभयो ।
यसैबिच बिहीबारबाट पुनः लकडाउनलाई थप कडा पारिएको छ । ‘म्यान क्याचर’ यन्त्रबाट सात महिला र १३ पुरुषलाइ नियन्त्रणमा लिइ कोरोना सङ्क्रमण हुने तरिका, लकडाउन र हातधुने तरिकाका बारेमा एक घण्टाको प्रशिक्षणपछि अब लकडाउनको उल्लङ्घन नगर्ने शर्तमा छाडिएको इलाका प्रहरी कार्यालय मेलम्चीका प्रहरी निरीक्षक तामाङले जानकारी दिनुभयो । साथै लकडाउनलाई बेवास्ता गर्दै गुडेका १५ मोटरसाइकल र चालकलाई कारवाही गरिएको तामाङले जानकारी दिनुभयो । सङ्घीय सरकारको निर्देशनानुसार मेलम्ची प्रवेश गर्ने नाकामा थप कडाइ गरिएको छ । बाहुनेपाटी, भोटेचौर र ढाँडखोलाका नाकामा थप कडाइ गरिएकोे तामाङले जानकारी दिनुभयो । साथै अतिआवश्यक कामबाहेक हिँड्डुल नगर्न र मानिस ओसारपसार नगर्न इलाका प्रहरी कार्यालय मेलम्चीले अनुरोध गरेको छ I
जुगल गाउँपालिकाले कोभिड–१९ महामारीका कारण बन्द रहेको विद्यालय शिक्षालाई फरक तरिकाले सञ्चालन गर्ने निर्णय गरेको छ । गाउँपालिकाअन्तर्गतका ४२ सबै सामुदायिक विद्यालयका प्रधानाध्यापकको भेलाले यो निर्णय लिएको हो । लकडाउनपछि हिजो पहिलोपटक जुगल गाउँपालिकाअन्तर्गतका प्रधानाध्यापकबीच निश्चित दूरी कायम राखी सुरक्षा विधि अपनाइ अन्तक्र्रिया कार्यक्रम सम्पन्न भएको हो ।
कोभिड–१९ महामारी अझै लामो समय जान सक्ने विज्ञले चेतावनी दिइरहेका छन् । यो महामारी र यसबाट सिर्जित परिस्थितिका बीचमा विद्यालय शिक्षालाई पुरानै अवस्थामा निरन्तरता दिन असम्भवजस्तै छ । यस्तो अवस्थामा हामी अभिभावकहरुको सहयोगमा बालबालिकालाई घरमै गराउन सकिने सिकाइ क्रियाकलापलाई सहजीकरण गर्ने निष्कर्षमा पुगेको छौँ । जुगल गाउँपालिकाका अध्यक्ष होमनारायण श्रेष्ठले बताउनुभयो ।
अब बालबालिकालाई विद्यालय खोलेर पुरानै अवस्थामा पढाउन नसकिने भएकाले नयाँ पद्धतिमा सोच्नपर्ने भएको छ । अभिभावकसमेतको सहभागितामा बालबालिकाका घरमै सिकाइ क्रियाकलापसँग जोड्नु जरुरी छ । यसका लागि गाउँपालिकास्तरीय सिकाइ सहजीकरण समन्वय समिति गठन गरिएको छ । यसले आवश्यक विधि, टुल्स र प्रक्रिया निर्माण गर्नेछ । त्यसैगरी सिकाइ क्रियाकलापको प्रभावकारिताका लागि वडास्तरीय सिकाइ सहजीकरण समन्वय समितिसमेत गठन गरिएको छ ।
