विश्वव्यापी महामारीका रूपमा फैलिएको कोरोना भाइरसको सङ्क्रमण फैलिन नदिन बन्दाबन्दी जारी गरिएको भए पनि विकास निर्माणका कामलाई अघि बढाउने गरी केही खुकुलो बनाएसँगै सहस्राब्दी पदमार्गमा रोकिएका कामलाई तीव्रता दिइएको छ ।
तनहुँको दुलेगौँडाबाट स्याङ्जाको रामबाछा जोड्ने ७२ किलोमिटर लामो नेपालकै मध्यपहाडी क्षेत्रस्थित पहिलो यो पदमार्ग (मिलेनियम ट्रेक) मा विकासको काम अघि बढिरहेका समयमा एकाएक कोरोना भाइरसको सम्भावित सङ्क्रमण फैलिन नदिन गरिएको बन्दाबन्दीले सम्पूर्ण काम रोकिएको थियो ।
पदमार्गको विकासका लागि चालू आर्थिक वर्षमा गण्डकी प्रदेश सरकारबाट विनियोजित रु ५० लाख बजेटअन्तर्गत विभिन्न काम अघि बढाइएको थियो । बीचमा सम्पूर्ण काम ठप्प भएको मिलेनियम ट्रेक व्यवस्थापन समितिका महासचिव हर्क गुरुङले जानकारी दिनुभयो । उहाँका अनुसार चालू आर्थिक वर्षकै लागि प्रदेश सरकारले सहस्राब्दी पदमार्ग, अन्नपूर्ण पदमार्ग र धवलागिरि पदमार्गका लागि रु १८ करोड रकम पनि विनियोजन गरेको छ ।
यसअघि नेपाल सरकारले घोषणा गरेको नेपाल भ्रमण वर्ष २०२० का अवसरमा न्यूनतम ५० हजार पदयात्री त्यसमार्गबाट हिँडाउने लक्ष्य समेत सार्वजनिक गर्दै प्रवद्र्धन र विकासलाई सँगसँगै बढाइरहेको अवस्थामा झण्डै दुई महिना बन्दाबन्दीले सबै काम रोक्नुपरेको उहाँको भनाइ छ ।
यस अवधिमा पदमार्गअन्तर्गत पर्ने तनहँुको शुक्लागण्डकी नगरपालिका–१० स्थित ढोर मूलकोट दरबार क्षेत्रलाई तारबारसहित व्यवस्थित गर्ने लक्ष्य राखिएको बताउँदै उहाँले विस्तृत आयोजना प्रतिवेदनसमेत तयार भइसकेको अवस्थामा ठेक्का सम्झौता भएर काम बढाउने तयारीमा लाग्दालाग्दै काम रोक्नुपरेको जानकारी दिनुभयो ।
आजभन्दा लगभग ३०० वर्ष पुरानो ढोर मुलकोट दरबारसहित त्यहाँका गढी, त्यहाँस्थित शक्तिपीठ, देउती बज्यैको थान, टक्सार घर आदिको भग्नावशेष समेतलाई संरक्षण गर्ने समितिको लक्ष्य छ ।
समितिले पदमार्गअन्तर्गतकै मिलेनियम गुफाको तारबारलगायतका कामलाई व्यवस्थित गर्ने योजना पनि बन्दाबन्दीबाट प्रभावित बनेको थियो । गुफालाई व्यवस्थितरूपमा तारबार गर्दै प्रवेशद्वार, टिकट घरजस्ता संरचना निर्माण गर्ने लक्ष्य राखिएको समितिले जनाएको छ ।
यसबीचमा नै समितिले शुक्लागण्डकी–११ राइपुरस्थित जन्तेढुङ्गालाई व्यवस्थित गर्ने योजना राखेको थियो । पदमार्ग क्षेत्रका प्रकृतिलाई पर्यटनसँग जोडी आर्थिक समृद्धिका लागि पहल गर्दै यहाँस्थित प्राचीन महत्वको जन्तेढुङ्गालाई घरबास र पर्यटनसँग जोड्ने पहल थालिएको छ ।
महासचिव गुरुङका अनुसार यो स्थानलाई व्यवस्थित गर्दै पर्यटकीयरूपमा जोड्नका लागि पहल थालिएको हो । आगामी वर्ष यही स्थानमा ललितकला प्रज्ञा प्रतिष्ठानसँगको सहकार्यमा मूर्ति कार्यशाला गर्ने तयारी गरिएको छ । स्थानीय जनशक्ति एवं साधनस्रोतको अधिकतम उपयोग गर्दै सामाजिक दूरी लगायतका आधारभुत कुराको पालना गरी काम अघि बढाउन लागिएको उहाँको भनाइ छ ।
पदमार्ग क्षेत्रकै भीरकोट नगरपालिका–३ स्थित भीरकोट दरबार र वडा नं ७ स्थित देउपूजी ढुङ्गालाई पनि तारबार एवं व्यवस्थित गर्न लागिएको छ । त्यस्तै पुतली बजार नगरपालिका–२ स्थित भैँसे गौँडाको खाँणदेवीको मन्दिर जाने सिँढी बाटोमा रेलिङ निर्माण गर्न लागिएको छ । पदमार्गकै कुसुम भञ्ज्याङबाट गहते मनकामना जाने सिँढी बाटो, पुतलीबजार नगरपालिका–९ कोल्मामा चरा एवं वन्यजन्तु अवलोकनस्थल लगायतका निर्माणकार्य पनि रोकिएकोमा आगामी दिनमा तीव्रताका साथ अघि बढाइने समितिका सदस्य एवं मिलेयिम भैसेगौँडा सामूदायिक होमस्टेका अध्यक्ष बालकुमार गुरुङले बताउनुभयो ।
“विकास निर्माणका काम अघि बढाउने गरी बन्दाबन्दी खुकुलो भएपछि रोकिएका कामलाई तीव्रता दिने हाम्रो लक्ष्य छ,” सदस्य गुरुङले भन्नुभयो, “सरकारले तोकेबमोजिक सामाजिक दूरीलगायतका आधाभूत कुरालाई पालना गर्दै आगामी दिनमा कामहरू अघि बढ्नेछन् ।”
