कोरोना भाइरस (कोभिड–१९)को सङ्क्रमण फैलिन नदिन सरकारले शुरु गरिएको बन्दाबन्दीका बीच पनि पूर्वाधार निर्माणको कामलाई निरन्तरता दिइएको छ ।
कोरोना रोकथाम तथा नियन्त्रणका लागि सामाजिक दूरी लगायतका सुरक्षा मापदण्ड पूरा गर्दै सडक निर्माणको काम अगाडि बढाइएको मेचीनगर नगरपालिकाले जनाएको छ ।
नगरपालिकाकी उपप्रमुख मीना उप्रेतीले भन्नुभयो, “कोरोना महामारी नभएको भए अहिले पूर्वाधार निर्माणका काम तीव्र गतिमा भइरहेको हुन्थ्यो ।” कोरोना सङ्क्रमण फैलिन नदिन सरकारबाट भएका निर्देशनलाई पूर्ण पालना गर्दै अहिले मेचीनगर–२ र ४ लाई जोड्ने दुई हजार ६६० मिटरको सडक निर्माणको काम शुरु गरिएको छ । उहाँले भन्नुभयो, “काममा खटिने जनशक्तिको स्वास्थ्यको पूर्णरूपमा ख्याल गर्दै काम अगाडि बढाइएको छ ।” “अहिले काम गरिने ठाउँमा निर्माण सामग्री र जनशक्ति उपलब्ध भएका विकास निर्माणका योजनाहरुलाई नै प्राथमिकतामा राखी काम अगाडि बढाइएको छ,” उहाँले भन्नुभयो, “बन्दाबन्दीका कारण कामविहीन बनेका मजदुरलाई प्रयोग गरेर सडक निर्माण कार्य शुरु गरिएको छ ।”
मेचीनगर नगरपालिका र नेपाल सरकारको समपूरक कोषको रु सात करोड ४४ लाखको लागतमा सो सडकको निर्माण कार्य शुरु भएको हो । मेचीनगर–२ भृकुटीस्थित भानु माध्यमिक विद्यालय पूर्वबाट मेचीनगर–४ को राइसिङ पुलसम्मको सडक कालोपत्र, कल्भर्ट र सडक किनारमा ड्रेन निर्माण कार्य भइरहेको नगरपालिकाकी उपप्रमुख उप्रेतीले बताउनुभयो ।
सो सडक निर्माणको स्थलगत अनुगमनमा आज नगरका प्रमुख प्रशासकीय अधिकृत महेन्द्रकुमार खामम्याङ, प्राविधिक विकास लिम्बू र विशाल राजवंशीसहित पुग्नुभएकी उपप्रमुख उप्रेतीले सडक निर्माणमा कार्यरत ५० जना मजदुरलाई भौतिक दूरी कायम गरेर काममा लगाइएकोे बताउनुभयो ।
मेचीनगर नगरपालिका र नेपाल सरकारको समपूरक कोषको ५०÷५० प्रतिशतमा गरिएको निर्माण कार्यको ठेक्का रौताहा शान्ति जेभियर्सले लिएको छ । आर्थिक वर्ष २०७६÷०७७ को असार २५ गतेभित्र निर्माण कार्य सम्पन्न गरी नगरपालिकालाई जिम्मा लगाउनुपर्ने सर्तअनुसार काम भइरहेको ठेकेदार कम्पनीले जनाएको छ ।
“लकडाउनको अवस्थामा स्थानीय मजदुरलाई रोजगारी पनि मिलेको छ”, उपप्रमुख उप्रेतीले भन्नुभयो, “नगरले दिएको राहतले मात्र जीविकोपार्जनमा समस्या भइरहेको हुँदा स्थानीय मजदुरलाई सङकटमा सहयोग मिल्नाका साथै विकास निर्माण पनि भएको छ ।”
उहाँले दुई हजार ६६० मिटरको सडक निर्माण गरिने स्थानमा पाँचवटा समूह विभाजन गरेर प्रत्येकमा १० जनालाई काम लगाइरहेको बताउनुभयो । सडकमा काम गर्ने मजदुर मास्कको प्रयोग र भौतिक दूरी कायम गरिएको छ । कोरानाका कारण कामविहीन बनेका मजदुरलाई सरकारको निर्णयानुसार नै सार्वजनिक स्थानका काममा लगाइएको उहाँको भनाइ छ ।
